பேருந்து ஓட்டுநர், நடத்துனர்களுக்கு வசூல்படி உயர்வு.. போக்குவரத்துத்துறை அமைச்சர் அறிவிப்பு596556214

பேருந்து ஓட்டுநர், நடத்துனர்களுக்கு வசூல்படி உயர்வு.. போக்குவரத்துத்துறை அமைச்சர் அறிவிப்பு

சாதாரண கட்டண பேருந்துகளின் ஓட்டுநர், நடத்துநர்களுக்கு வசூல்படி இரட்டிப்பாக வழங்கப்படும் என போக்குவரத்துத்துறை அமைச்சர் சிவசங்கர் தெரிவித்துள்ளார்.

இதுதொடர்பாக போக்குவரத்துத்துறை வெளியிட்டுள்ள அறிவிப்பில், தமிழ்நாடு அரசு போக்குவரத்துக்‌ கழகங்களில்‌ பணிபுரியும்‌ பணியாளர்களுக்கான 14வது ஊதிய ஒப்பந்த, நான்காவது கட்ட பேச்சுவார்த்தை 12.05.2022 அன்று போக்குவரத்துத்துறை அமைச்சர்‌ சிவசங்கர்‌ தலைமையில்‌,போக்குவரத்துத்துறை முதன்மைச்‌ செயலர்‌ கோபால்‌ முன்னிலையில்‌ நடைபெற்றது.

இக்கூட்டத்தில்‌ போக்குவரத்துக்‌ கழக தொழிற்சங்கங்களின்‌ பிரதிநிதிகள்‌ பங்கேற்று, மகளிர்‌ கட்டணமில்லாமல்‌ பயணம்‌ செய்யும்‌ பேருந்துகளின்‌ ஓட்டுநர்‌ மற்றும்‌ நடத்துனர்களுக்கு பேட்டாவை நிர்ணயம்‌ செய்திட வேண்டுமென கேட்டுக்கொண்டனர்‌.

முதலமைச்சரின்‌ அறிவுரையின்‌ பேரில்‌, "மாநகர்‌ போக்குவரத்துக்‌ கழகம், சென்னை உள்ளிட்ட தமிழ்நாடு அரசு போக்குவரத்துக்‌ கழக சாதாரண பயண கட்டண பேருந்துகளில்‌ மகளிர்‌ இலவச பேருந்து பயணம்‌ செய்ய அனுமதித்ததை தொடர்ந்து ஓட்டுநர்‌, நடத்துநர்கள்‌ பெற்று வந்த வசூல்படி (Collection Batta) குறைவினை ஈடுகட்டும் வகையில்‌ அதனை உயர்த்தி முறைப்படுத்தி வழங்கும்‌ வகையில்‌ சாதாரண கட்டண பேருந்துகளின்‌ ஓட்டுநர்‌ மற்றும்‌ நடத்துனர்களுக்கு தற்போது வழங்கப்பட்டு வரும்‌ வசூல்படி இரட்டிப்பாக வழங்கப்படும்‌ என போக்குவரத்துத்துறை அமைச்சர்‌ அறிவித்துள்ளார்‌. இவ்வாறு அதில் தெரிவிக்கப்பட்டுள்ளது.

முன்னதாக, தமிழக முதலமைச்சராக கடந்த வருடம் பொறுப்பேற்ற மு.க.ஸ்டாலின், பொறுப்பேற்ற அன்றைய தினமே நகரப் பேருந்துகளில் பெண்கள் இலவசமாக பயணம் செய்யலாம் என்ற அறிவிப்பை வெளியிட்டார்.  தொடர்ந்து தமிழகம் முழுவதும் உள்ள அரசுப் போக்குவரத்துக் கழகக் கட்டுப்பாட்டில் இயங்கும் சாதாரண கட்டண நகரப் பேருந்துகளில் பயணம் செய்யும் பணிபுரியும் மகளிர், உயர்கல்வி பயிலும் மாணவியர் உள்ளிட்ட அனைத்து மகளிரும் கட்டணமில்லாமலும், பேருந்துப் பயண அட்டை இல்லாமலும் பயணம் செய்ய முதலமைச்சர் உத்தரவிட்டார்.

அதன்படி  நகர பேருந்துகளில் பெண்கள் இலவசமாக பயணம் மேற்கொண்டு வந்தனர். பெண்களை தொடர்ந்து திருநங்கைகள்,  மாற்றுத்திறனாளிகள் மற்றும் அவரது உதவியாளர்களும் நகரப்பேருந்துகளில் கட்டணமின்றி பயணிக்கலாம் எனவும் தமிழக முதலமைச்சர் உத்தரவிட்டார் என்பது குறிப்பிடத்தக்கது.